Ayaz Quliyev Rusiya millisinə dəvət aldı

​"Rostov"un yarımmüdafiəçisi Ayaz Quliyev Rusiyanın 21 yaşadək futbolçulardan ibarət milli komandasına dəvət alıb.

Sportline.az xəbər verir ki, onun adı, Misirlə yoldaşlıq görüşü və Serbiya ilə 2019-cu il Avropa çempionatının seçmə oyunu üçün siyahıdadır. Kollektiv sentyabrın 3-də bir araya gələcək. Görüşlər isə müvafiq olaraq, sentyabrın 7-də Ximkidə və sentyabrın 11-də Nijni-Novqorodda olacaq.

Qeyd edək ki, Ayaz Quliyevin Azərbaycan milli komandasına dəvət alacağı bildirilir. Gənc futbolçunun UEFA Millətlər Liqası qarşılaşmalarına çağırılacağı barədə söz-söhbət yayılıb. O, Rusiya yığmasının düşərgəsinə yollanacağı təqdirdə, sentyabrın 7-də Kosovo ilə Bakıda, sentyabrın 10-da isə Malta ilə səfərdə keçiriləcək rəsmi oyunlarda iştirak edə bilməyəcək. Qaydalara əsasən, hər hansı futbolçu yalnız bir ölkənin əsas millisində oynaya bilər. Quliyev Rusiyanın yalnız aşağı yaş qruplarından ibarət komandalarında çıxış etdiyindən, Azərbaycan millisinə çağırılması gələcəkdə də mümkündür.