Dünya çempionatları tarixinin ən yaxşı qapıçısı
SportLine.az Rusiyada keçiriləcək Dünya çempionatı ərəfəsində bu yarış tarixində ən yadda qalan qapıçıları diqqətinizə çatdırır.
Dünya çempionatları tarixinin ən yaxşı qapıçısı Valter Zenqadır. İtaliya millisinin üzvü 1990-cı ildə vətənində keçirilən Mundialda 517 dəqiqə qapısını toxunulmaz saxlayıb. Qrup mərhələsində Çexoslovakiya, Avstriya və ABŞ millilərinə qarşı keçirilən oyunlarda qol buraxmayan V.Zenqa, 1/8 finalda Uruqvay, 1/4 finalda İrlandiya ilə görüşlərdə də rəqiblərin qənimi olub. Tilsim isə Argentina ilə yarımfinal görüşündə qırılıb. Matçın 67-ci dəqiqəsində Klaudio Kanica V.Zenqanın qapısına yol tapıb.
Çempionatlar tarixində ən çox oyunda qapısını toxunulmaz saxlayan qapıçılar isə Fransa millisinin sabiq futbolçusu Fabien Bartez və İngiltərə seçməsinin sabiq qapıçısı Peter Şiltondur.
P.Şilton 1982-1990-cı illərdə iştirak etdiyi Mundiallarda, ümumilikdə, 10 oyunda qapısını toxunulmaz saxlayıb. F.Bartez eyni nəticəni 1998-2006-cı illərdə göstərib.
Dünya çempionatlarında ən çox iştirak edən qapıçılar isə Antonio Karbaxal (Meksika) və Məhəmməd Əl Deayedir (Səudiyyə Ərəbistanı). A.Karbaxal 1950-1966, Əl Deaye isə 1994-2002-ci illərdə 5 dəfə Dünya çempionatlarının final mərhələsində çıxış edib.
Bir çempionatda qapısında ən çox qol görən qapıçı Duk-Yunq Honqdur (Cənubi Koreya). Koreyalı qolkiper 1954-cü ildə İsveçrədə təşkil olunan yarışda 16 dəfə topu tordan çıxarıb.
Bir oyunda ən çox qol buraxan qapıçı isə EL-Salvador millisinin üzvü Luis Qevara Mora olub. 1982-ci ildəki Mundialda Macarıstan seçməsinə qarşı görüşdə Qevara 10 dəfə məyus olub. Maraq üçün deyək ki, El-Salvador futbolçuları 10 qoldan 1-nə cavab verə biliblər.
Bir çempionatda qol buraxmayan yeganə qapıçı isə İsveçrə millisinin sabiq çərçivə qoruyucusu Patrik Tsüberbüler olub. 2006-cı ildəki Mundialda qrup mərhələsində qapısını toxunulmaz saxlayan qapıçı, 1/8 finalda Ukrayna ilə keçirilən görüşün də əsas vaxtında qol buraxmayıb. Ukrayna millisi penaltilər seriyasında İsveçrəni mübarizədən kənarlaşdırıb.
