"İstefamla bağlı söhbətləri normal qarşıladım" - Sənan Qurbanov

"Qəbələ” futbol komandasının baş məşqçisi Sənan Qurbanov "Report”un suallarını cavablandırıb. 

SportLine.az həmin müsahibəni təqdim edir:

- "Qəbələ” Azərbaycan Premyer Liqasının I turunda "Səbail”i 3:0 hesabı ilə məğlub etməklə, yeni mövsümə yaxşı başlanğıc etmiş oldu. Bu qalibiyyət Avropa Liqasındakı uğursuzluqdan sonra düşərgənizdəki ab-havanı dəyişməyə kömək etdi?

- Avropa Liqasının II təsnifat mərhələsində Lüksemburq "Proqres”i ilə oyunlardan sonra komandada psixoloji gərginlik var idi. Amma bunu tezliklə unutdura bildik. Uşaqlarla danışdıq, vəziyyətin yaxşıya doğru dəyişdiyini məşqlərdə hiss edirdik. "Keşlə” ilə yoxlama oyununda da müsbət siqnallar duyduq. Çempionata uğurlu start vermək bizim üçün çox önəmli idi. Bunun üçün köklənmişdik. Futbolçularımız məsuliyyəti dərk etdilər və önəmli qələbə qazandıq. Amma bu, hələ başlanğıcdır. Səhvlərimiz var, onların üzərində işləyirik. Komandanı qarşıda uzun marafon, ağır oyunlar gözləyir.

- "Proqres”ə evdə 0:2 hesablı məğlubiyyətdən sonra istefanız gündəmə gəlmişdi. Mətbuatda və sosial şəbəkələrdə yer alan bu söz-söhbətləri necə qarşıladınız?

- İstefamla bağlı söhbətləri normal qarşıladım. Yenilənmiş bir "Qəbələ” var. Ötən mövsüm başa çatandan sonra bir çox futbolçumuz getdi və onları başqaları əvəzlədi. Həmçinin, baş məşqçi postunda dəyişiklik oldu. Vaxt az olsa da, "Proqres” keçə biləcəyimiz bir rəqib idi. Səfərdə yaxşı oynadıq və 1:0 hesabı ilə qalib gəldik. Amma bu, bizim üçün yetərli olmadı. Əlimizə düşən imkanlardan istifadə edə bilmədik. Roman Qriqoruçkun dönəmində həm Avropa Liqasının qrup mərhələsində çıxış etdik, həm də daxili yarışlarda yaxşı nəticələr qazandıq. Bütün bunlardan sonra "Proqres”i keçə bilmədiyimiz üçün insanların reaksiyasın normal sayıram. Bu klub mənim üçün çox doğmadır. Rəhbərlik məni bu posta bir oyunluq qoymamışdı. Əlimdən gələnin ən yaxşısını etməyə çalışıram.

- Komanda Qriqrorçukun dönəmində formalaşan oyun üslubunu qoruyacaq, yoxsa fərqli "Qəbələ” görəcəyik?

- Futbolda əsas olan oyun fazalarıdır. Biz futbolçularımızın həm müdafiədə, həm də hücumda inkişaf etmələrini istəyirik. "Səbail” bizə qarşı 5 müdafiəçi ilə çıxış etdi, növbəti rəqiblər 4 müdafiəçidən istifadə edə bilər. Bu baxımdan oyunumuzu rəqiblərə uyğun qurmağa çalışırıq. Rəqibləri analiz etdikdən sonra onlara qarşı necə müdafiə olunmağı və hansı şəkildə hücum etməyi müəyyənləşdiririk. Hər bir baş məşqçinin öz fəlsəfəsi var. Mənim Qriqorçukdan öyrəndiklərim olub. İndi özümün də düşündüyüm bəzi elementləri tətbiq etmək istəyirəm.

- Komandaya yeni qoşulan legionerlər gedənlərlə eyni səviyyədədirlər?

- Yenilər izlədiyimiz oyunçulardır. "Qəbələ”də həmişə keyfiyyətli futbolçular olub. İndikilər də bu qəbildəndir. Futbolçularımızın durumu hər gün daha da yaxşılaşır, inkişaf edirlər. Gedənlərlə gələnləri müqayisə etmək istəməzdim. Hər birinin öz üstün cəhəti var.

- Zədəli Stiven Jozef-Monrozun durumu necədir?

- İlk oyundan əvvəl məşqdə zədələndi. Hazırda komandadan ayrı çalışır. Elvin Camalovun burnunda problem var. Onların növbəti turdan meydana çıxıb-çıxmayacaqları dəqiq bilinmir. Həkimlərin rəyinə baxacağıq.

- Avqustun 19-da II tur çərçivəsində "Neftçi”nin qonağı olacaqsınız. Bu görüşü yüksək hədəflərinizi ortaya qoymaq baxımından önəmli sayırsınız?

- Bizim üçün hər bir oyun çox vacibdir. Bütün rəqiblərlə matçlara qələbə üçün çıxacağıq. Nə dərəcədə alınacağını zaman göstərəcək. Biz öz oyunumuzu göstərməyə, sürətli və aqressiv olmağa çalışacağıq. Rəqibləri bir-birindən ayırmırıq.

- Baş məşqçilərin rəqiblər arasında fərq qoymaması normaldır. Amma reallıq budur ki, son illərdə çempionluq mübarizəsində "Qarabağ”la yalnız bir komanda – "Qəbələ” çəkişirdi. İndi belə bir fikir formalaşıb ki, Ağdam klubu əsasən "Neftçi” ilə rəqabət aparacaq. Bununla razısınız, yoxsa komandanız da çempionluq mübarizəsində yer alacaq?

- Heç kim uduzmağı sevmir. Meydanda iddialı bir "Qəbələ”nin olmasına çalışacağıq. Hansısa rəqibin bizdən güclü olması ilə barışa bilmərik. Qətiyyən ola bilməz. Öz gücümüzə, potensialımıza inanırıq. İşə yanaşmamız çox ciddidir. Yerimizdə saymamalıyıq. Hər gün bir az da qabağa getməliyik. Məqsəd "Qəbələ”nin iddiasını qorumaqdır.

- Premyer Liqa klublarının çoxu Bakıda olduğundan, Qriqorçuk dönəmində "Qəbələ” də paytaxtda məskunlaşmışdı. Bunu dəyişməyi düşünmürsünüz?

- Hazırda da bu cür davam edirik. Məşqlərimizi "Bakı” klubunun bazasında keçiririk. Komandanların çoxu paytaxtda məskunlaşdığı üçün səfər oyunları zamanı burada qalırıq. Amma ev matçları vaxtı Qəbələdə oluruq.

- Vitse-prezidentiniz Fariz Nəcəfov ötən mövsüm Premyer Liqanın bombardiri olmuş hücumçunuz Baqali Dabonun "Qəbələ” rəhbərliyini aldadaraq, "Neftçi”yə keçdiyini söyləyib. Onun rəqib düşərgəsinə yollanmasına sizin münasibətiniz necədir?

- Dabo keyfiyyətli oyunçudur. Bizimlə müqaviləsi bitmişdi, "Neftçi”yə keçdi. Düzdür, bizə söz vermişdi. Amma fərqli qərar qəbul etdi. O, artıq bizim oyunçu deyil. Bu gün məni yalnız öz komandamız, futbolçularımız maraqlandırır.

- Dabo ilə yanaşı, başqa bir əsas oyunçunuz – Filip Ozobiç də "Qarabağ”a keçdi. Onların gedişinə təəssüflənirsiniz?

- Bu, onların seçimidir. Müqavilələrinin müddəti bitmişdi, sərbəst futboçu idilər. Getmək istədilər. Pulu və ya başqa nəyi seçdilər, bilmirəm, öz işləridir.