Kolumbiya qələbə, Argentina 1 xal qazandı

Futbol üzrə Amerika Kubokunun qrup mərhələsinin 2-ci turunda Kolumbiya seçməsi Qətər millisi ilə qarşılaşıb.

Sportline.az xəbər verir ki, matç cənubi amerikalıların 1:0 hesablı qələbəsi ilə yekunlaşıb.

Oyunda yeganə qolu 85-ci dəqiqədə Xames Rodriqes vurub.

Ardıcıl ikinci qələbəsini qazanan Kolumbiya "B" qrupunun birinci pilləsində möhkəmlənib və turnirin "play-off" mərhələsini özünə təmin edib.

Qrupun digər qarşılaşmasında Argentina Paraqvayla bacarmayıb. Oyun 1:1 hesablı heç-heçə ilə başa çatıb. Qolların hər ikisi penaltidən vurulub: müvafiq olaraq Lionel Messi və Derlis Gonzalez fərqlənib.

Hazırda Kolumbiya qrupda 6 xalla birinci, Paraqvay 2 xalla 2-ci, Qətər 1 xalla 3-cü, Argentina isə 1 xalla sonuncu pillədə qərarlaşıb.