Mövsümün 150-ci qolu, Eminin ilk dublu

Topaz Premyer Liqasında 2018/19 mövsümünün 150-ci qolu vurulub. SportLine.az Peşəkar Futbol Liqasının saytına istinadən xəbər verir ki, bu qola “Neftçi” – “Keşlə” qarşılaşmasında hesabı açan Emin Mahmudov imza atıb. Xatırladaq ki, mövsümdə ilk qolu I turun “Sumqayıt”la oyununda (2:0) “Neftçi”nin futbolçusu Mirabdulla Abbasov, 50-ci qolunu “Səbail”lə VI turda (4:0) onun komanda yoldaşı Dario Frederiko vurub. 100-cü top isə XI turun “Qəbələ” – “Qarabağ” görüşünə (1:3) hesabı açan meydan sahiblərinin futbolçusu Ceyms Adeniyinin aktivinə yazılıb.

Qeyd edək ki, “Keşlə” ilə qarşılaşmada komandasının hər iki qoluna imza atan Mahmudov karyerasında ilk dublu rəsmiləşdirib.