"Sumqayıt"ın ən böyük hesablı ev məğlubiyyəti

Topaz Premyer Liqasında  XXII turun “Sumqayıt” – “Qarabağ” oyunu bir neçə maraqlı məqamla əlamətdar olub.

Sportline.az Peşəkar Futbol Liqasının rəsmi saytına istinadən xəbər verir ki, 0:6 hesabı ilə uduzan meydan sahibləri ev matçlarında yubiley – 50-ci məğlubiyyətini alıb. Premyer Liqada 2011-ci ildən çıxış edən sumqayıtlılar 122-ci qarşılaşmada 50-ci məğlubiyyətə üzülüblər. Komandanın ev oyunlarında 41 qələbə və 31 heç-heçəsi var. Çempionatın autsayderi üçün bu yenilgi antirekord kimi tarixə düşüb. Bu, “Sumqayıt”ın Premyer Liqada aldığı ən böyükhesablı ev məğlubiyyətidir.

Yeri gəlmişkən, “Qarabağ” çempionatdakı ən böyükhesablı qələbə rekordunu təkrarlayıb. Cari mövsümdə - ötən il dekabrın 9-da “Zirə”nin qapısından 6 cavabsız qol keçirən ağdamlılar bu dəfə “Sumqayıt”ın meydanında eyni hesaba seviniblər.
Bu, həm də cari mövsümün ən böyükhesablı nəticəsinin təkrarıdır. 6 top fərqi ilə başa çatan hər iki görüşdə “Qarabağ” rəqib meydanında qalib gəlib.