Klublarımızın futbolçulara ödədiyi məvacib açıqlandı
Azərbaycan Premyer Liqasında çıxış edən klubların 2018-ci maliyyə ili üzrə futbolçulara ödədiyi maaşın miqdarı müəyyənləşib.
Sportline.az xəbər verir ki, bu barədə UEFA-nın lisenziyalı klublar haqqında müqayisəli hesabatında bildirilib. Çempionat iştirakçısı olan 8 komanda futbolçulara ümumilikdə 17 milyon avro əmək haqqı ödəyib.
Bu isə hər klubun orta hesabla 2.1 milyon avro maaş verməsi deməkdir.
Premyer Liqamız bu göstəricidə Avropada 30-cudur. İngiltərə Premyer Liqası 3 milyard 235 milyon avro maaşla ilk sıradadır. İspaniya La Liqası 2-ci (2 milyard 20 milyon avro), Almaniya Bundesliqası isə 1 milyard 664 milyon avro maaşla 3-cüdür.
