Sərbəst güləşçilərimiz dünya çempionatında uğursuz çıxış etdilər

Azərbaycanın sərbəst güləşçiləri Serbiyanın paytaxtı Belqradda keçirilən lisenziya xarakterli dünya çempionatının ilk günündə uğursuz çıxış ediblər.

Sportline.az xəbər verir ki, bu gün mübarizəyə qoşulan 4 güləşçinin hamısı məğlub olub.

61 kq çəki dərəcəsində çıxış edən İntiqam Vəlizadə təsnifat mərhələsində Cənubi Koreya təmsilçisi Hyeonsik Sonqa qalib gəlsə də, ardınca qırğızıstanlı Taiyrbek Uuluya uduzub.

70 kq-da Maqomed-Başir Xaniyev eyni raundda Qazaxıstandan olan Sanjar Dojanovdan güclü olub. Lakin Xaniyev İran idmançısı Amirməhəmməd Yazdaniçeratinin müqavimətini qıra bilməyib.

86 kq-da Əbubəkr Abakarov 1/16 finalda kanadalı Aleksandr Muru üstələsə də, Fransanı təmsil edən Rəhim Maqamadova yenilib.

125 kq-da Georgi Meşvildişvili 1/16 finalda bolqarıstanlı İslam Adizovu məğlub edib. O, növbəti raundda türkiyəli Taha Akgüllə bacarmayıb.