"Qarabağ"ın uğuru Azərbaycan üçün nailiyyətdir"
"Qarabağ"ın UEFA Çempionlar Liqasının Liqa mərhələsinə vəsiqə qazanması Azərbaycan üçün nailiyyətdir.
Sportline.az xəbər verir ki, bunu Azərbaycan millisinin baş məşqçisi Fernandu Santuş DÇ-2026-nın seçmə mərhələsində səfərdə İslandiya yığmasına qarşı keçirəcəkləri görüşdən əvvəl mətbuat konfransında deyib.
70 yaşlı mütəxəssis komandanı uğur münasibətilə təbrik edib və gözləntilərinin bölüşüb:
"Başda Qurban Qurbanov olmaqla, "Qarabağ"ı təbrik edirəm. Bu uğur Azərbaycan üçün nailiyyətdir. Avropada Azərbaycan haqqında danışacaqlar. Amma Çempionlar Liqasının Liqa mərhələsində "Qarabağ üçün asan olmayacaq. Ümid edirəm ki Azərbaycanı yaxşı təmsil edəcəklər. Mən və bütün ölkə bunu gözləyirik. Komandanın neçə xal qazanacağı haqqında isə fikir bildirə bilmərəm".
O, millinin heyətinə cəlb olunan qapıçılarla bağlı bunları deyib:
"Əlbəttə, rəqabət mühitində özünü göstərə bilməyən futbolçu məni narahat edə bilər. İstərdim ki bütün oyunçular komandalarında şans qazansınlar. Amma reallıq belədir və bu ssenari ilə davam etməliyik".
F.Santuş komandada ab-havanın yaxşı olduğunu vurğulayıb:
"Oyunçular çox istəklidirlər, həvəslə hazırlaşırlar. Bu da bizə nəticə əldə etməyə imkan verəcək. İstər mən, istərsə də Azərbaycan xalqı olsun, hamımız qələbə gözləyirik".
Portuqaliyalı mütəxəssis Bədavi Hüseynovun milliyə dəvət almamasına belə münasibət bildirib:
"Bədavi Hüseynova böyük hörmətim var. İstərdim ki, bizimlə olsun. Amma formada olmadığı üçün heyətə dəvət etməmişik. Hazırda bizə kim kömək edə bilərsə, onu da dəvət etmişik".
O millinin rəqiblərini təhlil edib:
"İslandiya təcrübəli və keyfiyyətli komandadır. Xaricdə oynayan futbolçuları var. Topsuz olanda aqressiv çıxış edirlər. Oyunlarını izləmişik və güclü, həmçinin zəif tərəflərini bilirik. Hücumda güclüdürlər. 4-3-2-1 sxemi ilə çıxış edirlər. Ukrayna da çox güclü rəqibdir. İşimiz hər iki komandanı təhlil etməkdir. İslandiya uzun səfər olduğu üçün komandanın oyununa təsir edə bilər. Ona görə də səfərə daha tez yollanmağı nəzərdə tutmuşuq. Daha sonra evdə oynayacağıq. Azarkeşlərin dəstəyinə güvənirəm.
Qeyd edək ki, yığma sentyabrın 5-də Reykyavikdə İslandiya və sentyabrın 9-da Bakıda Ukrayna ilə üz-üzə gələcək.
