Cüdo Federasiyası İran və İraqla əməkdaşlıq sazişi imzaladı
Dekabrın 27-də Azərbaycan Cüdo Federasiyasında (ACF) yeni əməkdaşlıq sazişi imzalanıb. SportLine.az xəbər verir ki, sazişi ölkəmizdə səfərdə olan İranın Cüdo Federasiyasının prezidenti Məhəmməd Deraxşanmübarək, İraq Cüdo Federasiyasının prezidenti Samir Əl-Musəvi və ACF-in vitse-prezidenti Sadıq Sadıqov imzalayıblar.
Əməkdaşlıq sazişinə əsasən ACF, İran İslam Respublikasının Cüdo Federasiyası və İraq Cüdo Federasiyaları dostluq münasibətlərini və qarşılıqlı əməkdaşlığı inkişaf etdirərək, bütün yaş qrupları üzrə milli komandaların birgə təlim-məşq toplanışlarını, turnirlər, yoldaşlıq görüşlərinin təşkili və keçirilməsini reallaşdıracaq.
Tərəflərin üzvü olan idman təşkilatlarının, eləcə də idman məktəblərinin əməkdaşlığına şərait yaradılacaq. Məşqçilər və hakimlər üçün birgə seminarlar təşkil ediləcək. Müxtəlif təcrübə mübadiləsi layihələrinin hazırlanması və həyata keçirilməsi də nəzərdə tutulur. Həmçinin, müxtəlif yarışlarda təmsil olunmaq üçün zəruriyyət yaranmış çəki dərəcələrində idmançı transferlərinin həyata keçirilməsi də gələcək planlar daxilindədir.
Görüşdə Sadıq Sadıqov qonaqlara xatirə hədiyyələrini təqdim edib.
Azərbaycan Cüdo Federasiyasının məlumatı
