"Azərbaycanda dostlarım çoxdur" - moldovalı məşqçi

“Uzun müddət böyük futbolda çalışmışam, PRO kateqoriyalı məşqçiyəm. Azərbaycanda dostlarım çoxdur. Rəhmətlik Əhməd Ələsgərov müəllimim olub. Ondan çox şey öyrənmişəm. O, həm də Moldova futbolunun əfsanəsi hesab edilirdi. Ağasəlim Mircavadov, Vaqif Sadıqovla tez-tez əlaqə saxlayıram”. SportLine.az AFFA-nın saytına istinadən xəbər verir ki, bunu futzal üzrə Moldova millisinin baş məşqçisi Vladimir Vusati deyib.

Millimizlə ikinci hazırlıq oyununda da uduzan şərqi avropalıların çalışdırıcısı fikirlərini bölüşüb: “Moldova ilə Azərbaycan futzalında fərqli ab-hava var. Bizim çempionatın səviyyəsi yüksək deyil. Klublarımız çempionat oyunları zamanı həftədə cəmi 2 dəfə məşq edirlər. Millinin toplanış olan zaman isə heç bir klubumuz məşq keçmir. Oyuna gəldikdə, bu gün daha yaxşı oynadıq. Amma komandanızın heyətində fərdi keyfiyyətlərinə görə seçilən futzalçılar çoxdur və bu da oyunun taleyini həll edir. Bizim yeganə motivasiyamız istəkli olmağımızdı. Sonda qonaqpərvərliyə və isti qarşılanmaya, eləcə də yaradılan şəraitə görə təşəkkürümü bildirirəm”.