Nicat Məmmədli: "Əsas məqsəd pley-offa düşməkdir"
Azərbaycan basketbol liqasında 6-cı tur çərçivəsində "Xırdalan" klubu "Xəzri"yə 84:105 hesabı ilə məğlub olub.
Sportline.az xəbər verir ki, "Xırdalan" komandasının hücumçusu Nicat Məmmədli matçdan sonra klubun mətbuat xidmətinə oyunla bağlı fikirlərini bölüşüb:
"İlk periodda müdafiədə olan boşluqlara görə fərq çox artdı. Rəqibin əks hücumları da effektiv idi. Oyunun ikinci yarsısına yaxşı başladıq. Səhvlərimizi düzəltdik, amma fərq çox olduğundan aradan qaldırmaq mümkün olmadı. Bundan sonra çalışacağıq ki, səhvlərimizdən nəticə çıxaraq. Əsas məqsəd pley-offa düşməkdir. Bunun üçün digər görüşlərdə qələbələri sıralamağa borcluyuq.
Mən mövsümün əvvəlində sonuncu yoldaşlıq görüşündə dirsəkdən aldığım zədədən sonra ilk oyunlarda komandaya çox kömək edə bilməmişdim. Amma indi tam formama qayıtmağa çalışıram. Ümid edirəm bundan sonra daha yaxşı performans sərgiləyəcəyəm".
