Azərbaycan çempionatında 400-cü qol
Futzal üzrə Azərbaycan çempionatının Yüksək Liqasının cari mövsümündə 400-cü qol vurulub. SportLine.az Azərbaycan Futzal Federasiyasının saytına istinadən xəbər verir ki, EKOL – Liman matçının 29-cu dəqiqəsində Faiq Əliyevin özünün 4-cü, komandasının 11-ci qolu yubiley qolu olub.
Hazırda Yüksək Liqada 409 qol vurulub.
Tur həm də “Yasamal” FK üçün əlamətdar olub. “Yasamal” İSK ilə dueldə böyükhesablı qələbə qazanan “Yasamal” FK Yüksək Liqada 50-ci oyununu keçirib.
Paytaxt təmsilçisi bu duellərdən 15-də qələbə qazanıb, 2 matçda xalları yarı bölüb. 33 görüşdə meydanı məğlub tərk edən Yasamal indiyə qədər 243 qol vurub, qapısından isə 326 top buraxıb.
