"İdmançı gərək bütün diqqətini məşqinə yönəltsin" - Namiq Əliyev
Bu gün Azərbaycan Güləş Federasiyasının (AGF) prezident əvəzi Namiq Əliyev Olimpiya Güləş Mərkəzində təlim-məşq toplanışı keçən yunan-Roma güləşi üzrə Azərbaycan yığmasının açıq məşqini izləyib.
SportLine.az xəbər verir ki, AGF rəhbəri hazırlıq prosesinin startı ərəfəsində güləşçilərlə görüşüb. Baş katib Orxan Məmmədov, vitse-prezidentlər Elçin Cəfərov və Namiq Abdullayevin də qatıldığı görüşdə N.Əliyev pəhləvanlara qarşıdan gələn məsul yarışlarda uğurlar arzulayıb, onların problemləri ilə maraqlanıb və fikirlərini çatdırıb:
“Əksəriyyətinizin kifayət qədər təcrübəsi var. Bir qisminiz yeniyetmələr və gənclər, bir qisminiz isə böyüklər arasında Avropa və dünya çempionatlarında, olimpiadalarda fərqlənmisiniz. Güləşdə yetərincə məsafə qət etmisiniz. Geriyə boylanıb, müəyyən yarışlardakı çıxışlarınıza baxsanız, bəzən döyüşkənliyin çatmadığını görərsiniz. İdmançı ilk növbədə özünə inanmalıdır. Rəqiblərinizdə qeyri-adi bir şey yoxdur. Olimpiadaya gedəcək güləşçilərimiz gecə-gündüz olimpiya çempionu olacağını düşünməlidir. İdmançı ki, o arzuyla yaşamır, heç vaxt olimpiya çempionu ola bilməyəcək".
Federasiya rəhbəri komandaya tövsiyələrini də çatdırıb: "Bu il Türkiyə və İrandakı beynəlxalq turnirlərdə iştirak etmisiniz. Bir neçə güləşçi isə gələn həftə Macarıstandakı yarışda qüvvəsini sınayacaq. Avropa çempionatına çox az vaxt qalıb. Bu il 2-ci Avropa Oyunları da olacaq. Ondan sonra isə bizi dünya çempionatı gözləyir.
Problemlərlə məşqə gəlmək olmaz. İdmançı gərək bütün diqqətini məşqinə yönəltsin. Hamınız peşəkar idmançısınız. Bu, sizin işinizdir. Həmişə geriyə boylanıb, səhvlərinizi təhlil edin. Hamınıza uğurlar arzulayıram”.
Daha sonra E.Cəfərov yığmanın bir neçə komanda ilə birgə təlim-məşq toplanışı keçməsinin faydalı ola biləcəyini deyib. AGF-nin prezident əvəzi təklifi müsbət qarşılayıb və bu məsələnin həllini tapacağını bildirib.
