Samir Abasov: "Heç-heçəyə görə sevinmirəm”

"Sumqayıt"ın baş məşqçisi Samir Abasov Topaz Premyer Liqanın 16-cı turunda "İnter"lə oyundan (2:2) sonra mətbuat konfransı keçirib.

SportLine.az-ın futbolxeber.az-a istiandən yaydığı xəbərə  görə, o, qarşılaşma haqda fikirlərini bildirib.

- Maraqlı oyun izlədik. "İnter"lə oynamaq bizə həmişə çətin olur. Etiraf edim ki, heç-heçəyə görə sevinmirəm. Bərabərliklərlə uzağa getmək olmaz.
 
- Nəticəni məntiqli sayırsız?

- Nəticə ədalətlidir. Sadəcə, evdə oynadığımızdan qalib gəlmək istəyirdik.
 
- Səmimi deyin, 1:2-dən sonra oyunun getdiyini düşündünüz?

- Etiraf edim ki, əlimi oyundan üzmüşdüm.
 
- Deyirsiz maraqlı oyun oldu. Ancaq oyunda sürət yox idi axı. Siz tapşırmışdız oyunu qurutsunlar, yoxsa futbolçularınız rəqibin ad-sanından çəkindi?

- Razılaşıram. Futbolçulara tempi aşağı salmaq tapşırığı verməmişdim. Çernışovun sürətinə güvənirdim. O da məşqdəki futbolu ortaya qoymadı. Əvəzetmədən oyuna daxil olanlar isə bəlkə də rəqibin adından çəkindi.
 
- Fərhad Vəliyevin oyununu şərh edərdiniz...

- Fərhadda yerdən-göyə qədər razıyam. Oyunda da, paltardəyişmə otağında da, o, komandanın lideridir.