“Çelsi” - “Arsenal” matçı sülhlə başa çatdı

İngiltərə Premyer Liqasında 13-cü turun oyunları davam edir.

Sportline.az xəbər verir ki, turun mərkəzi matçı "Stemford Bric"də keçirilib. "Çelsi" "Arsenal"la qarşılaşıb.

Görüş qarşılıqlı hücumlar şəraitində başlayıb. 36-cı dəqiqədə “Çelsi”nin ekvadorlu yarımmüdafiəçisi Moyzes Kaysedo Mikel Merinoya qarşı kobudluğa görə qırmızı vərəqə ilə cəzaladırılıb. İlk hissə qolsuz bərabərliklə yekunlaşıb.

Sükut 48-ci dəqiqədə pozulub. “Çelsi” “Arsenal”ı öz silahı ilə vurdu desək yanılmarıq. Belə ki, meydan sahibləri küncdən zərbəni əla yerinə yetirərək, hesabı açmağı bacarıblar. Riz Ceymsin ötürməsini Trevo Çalabo dəqiq zərbə ilə tamamlayıb. 1-0.

Hesabda geri düşən Mikel Artetanın komandası dərhal hücuma atılaraq hesabı bərabərləşdirib. Bukayo Sakanın mükəmməl ötürməsindən Mikel Merino lazımınca yararlanıb. 1-1.

Qalan vaxtda rəqibin 10 nəfərlə olmasını fürsət bilib irəli atılan, “topçular”ın bütün cəhdləri uğursuz alınıb. Görüş 1-1 hesabı ilə yekunlaşıb.

“Arsenal” 30 xalla çempionata başçılıq edir. “Çelsi” 24 xalla 3-cüdür.