İslam Oyunlarında 8 futbol millisi mübarizə aparacaq

2017-ci ildə Bakıda keçiriləcək IV İslam Həmrəyliyi Oyunlarında 8 futbol millisi mübarizə aparacaq. SportLine.az xəbər verir ki, bu barədə Gənclər və İdman Naziri, IV İslam Oyunları Əməliyyat Komitəsinin baş icraçı direktoru Azad Rəhimov məlumat verib. 

Onun sözlərinə görə, ev sahibi kimi Azərbaycan bütün idman növlərində, eləcə də, futbol yarışlarında təmsil olunacaq. Digər 7 komanda isə seçimlə müəyyənləşəcək: "Bu yarışlar böyüklərin arasında keçiriləcək. Müxtəlif fikirlər vardı. Bütün İslam Oyunlarında futbol çox populyar olub. Biz də istərdik ki, futbola maraq olsun və Oyunlarda tamaşaçıların sayı artsın. Amma hansı ölkələrin iştirak edəcəyi ilə bağlı məlumat yoxdur. Hələ seçimlər gedir".

Qeyd edək ki, İslam Həmrəylik Oyunları gələn il 12-22 may tarixlərində keçiriləcək.