İtaliya A Seriyasında təqvim açıqlandı

İyunun 20-də bərpa ediləcək İtaliya A Seriyasında, mövsümün qalan hissəsinin təqvimi təsdiqlənib.

 

Sportline.az xəbər verir ki, çempionat iyunun 20-də 25-ci turdan təxirə salınmış oyunlarla bərpa olunacaq. İlk olaraq, Bakı vaxtı ilə saat 21:30-da "Torino" - "Parma" görüşü başlanacaq. Eyni günə daha bir matç təyin olunub. 23:45-də "Verona" "Kalyari" ilə qarşılaşacaq.

 

İyunun 21-də təxirə salınmış digər qarşılaşmalar - "Atalanta" - "Sassuolo", "İnter" - "Sampdoriya" - oynanılacaq. Bütün komandalar oyun saylarını 26-ya çatdırdıqdan sonra növbəti tur başlayacaq.

 

Hələlik, 36-cı tura qədər olan oyun cədvəli açıqlanıb.

 

Qeyd edək ki, 26 turdan sonra aktivində 63 xal olan "Yuventus" turnir cədvəlinə başçılıq edir. İkinci yerdə olan "Latsio" liderdən bir xal geri qalır.