Samir Abasov:" Ümid edirəm ki, danışıq apardığımız oyunçuları gətirə biləcəyik"

"Ümid edirəm ki, danışıq apardığımız oyunçuları gətirə biləcəyik".

Sportline.az xəbər verir ki, bunu "Neftçi"nin baş məşqçisi Samir Abasov "Araz-Naxçıvan"a 1:2 hesabı ilə uduzduqları Azərbaycan Premyer Liqasının XX turunun oyunundan sonra mətbuat konfransında deyib.

Mütəxəssis hücum qurmaqda problemlərinin olduğunu bildirib:

"Bunlar əvvəldən də var idi. Bizim üçün sönük oyun alındı. Futbolçular istədiyimizi və verilən tapşırıqları yerinə yetirə bilmədilər. İkinci yarıda bunları dəyişməyə çalışdıq. Alındı, qol epizodlarımız da oldu. Amma fərqlənə bilmədik".

Abasov təcrübəli oyunçuların bəzi səhvlər etdiyini söyləyib:

"Çətinliklərimiz var. Bunların öhdəsindən hələlik gələ bilmirik, həll etməkdə çətinlik çəkirik. Ümid edirəm ki, danışıq apardığımız oyunçuları gətirə biləcəyik. Bəlkə nələrisə dəyişək. Artıq gücümüzü tam olaraq ölkə kubokuna verəcəyik. Amma bu o demək deyil ki, çempionat matçına məğlubiyyət üçün çıxacağıq".