Seçməmiz Dünya kubokunda bu heyətlə çıxış edəcək

Bədii gimnastika üzrə Azərbaycan seçməsinin Dünya Kubokunun finalında çıxış edəcək heyəti açıqlanıb. SportLine.az xəbər verir ki, iyulun 22-24-də Bakıda keçiriləcək yarış üçün ölkəmiz 7 idmançı sifariş edib.

Baş məşqçisi Mariana Vasileva şəxsi mübarizədə Avropa Oyunlarının gümüş medalçısı, Rio-2016-ya lisenziya qazanmış Marina Durunda, eləcə də, böyük gimnastlar sırasına yenicə qədəm qoyan Avropa çempionatının (gənclər) ikincisi Jalə Piriyevanı sınamağa qərar verib. Qrup hərəkətlərində isə yığmamızın şərəfini Siyana Vasileva, Ayşən Bayramova, Aleksandra Platonova, Diana Doman və Elif Zeynep Celep qoruyacaqlar.

Ümumilikdə, Bakıya dünyanın 22 ölkəsinin seçməsi gələcək. Yarışların ilk iki günü 34 gimnast və 11 qrup hərəkətləri komandası medallar uğrunda çoxnövçülükdə mübarizə aparacaq. Kubokun son günü ayrı-ayrı alətlər üzrə final mərhələləri baş tutacaq.  

Bu il Dünya Kubokunun 9 mərhələsi keçirilib. Bakı finalında öncəki mərhələlərdə göstərilmiş ən yaxşı 4 nəticəyə əsasən birinci yeri tutan gimnastlar və qrupların xüsusi mükafatlandırma mərasimi keçiriləcək.

Qeyd edək ki, yarış Milli Gimnastika Arenasında keçiriləcək. Biletlərin qiyməti 5-20 manat təşkil edir. Biletlər yarışların hər 3 gününə alındıqda, endirimlər olacaq. Tələbələr də xüsusi endirimdən yararlana bilərlər.