Şəfəq Kərimova: "Unudulmaz bir gün oldu"
“Yanvar ayının 9-u mənim üçün çox önəmli, çox yadda qalan, çox gözəl bir gün oldu. Unudulmaz bir gün oldu. Mən dünənki tədbirdə iştirak etdim. Cənab Prezidentimizin çıxışını canlı olaraq dinlədim. Orada iştirak etməyin özü bir vətəndaş kimi, bir idmançı kimi mənə daha da həvəs verir, daha da məni işimə bağlayır”.
Bu sözləri Sportline.az saytına açıqlamasında sabiq voleybolçu, hazırda Azərbaycan Voleybol Federasiyasının mətbuat katibi olan Şəfəq Kərimova Prezident İlham Əliyevin onu ev ilə mükafatlandırması barədə danışarkən deyib.
“Tədbirin sonunda bir çox idmançılar, idman mütəxəssisləri, məşqçilər mükafatlandırıldı Cənab Prezident tərəfindən. Onlardan biri də mən oldum. Mən də mənzillə mükafatlandırıldım. Buna görə, ölkə başçısına təşəkkür etmək istəyirəm. Bu işdə əməyi olan hər kəsə - Milli Olimpiya Komitəsinə, Gənclər və İdman Nazirliyinə, Azərbaycan Voleybol Federasiyasına - hər bir kəsə təşəkkür edirəm.
Yeri gəlmişkən, 2022-ci ilin sonunda idman ailəsinin bir çox üzvü Cənab Prezident tərəfindən fəxri adlarla təltif olundular. Onları da təbrik etmək istəyirəm. İnanıram ki, 2023-cü il bizim üçün, idman ailəsi üçün, idman federasiyaları üçün, Gənclər və İdman Nazirliyi, Milli Olimpiya Komitəsi üçün - hər kəs üçün uğurlu bir il olacaq. 2023-cü il Ulu Öndər “Heydər Əliyev İli”dir. İnaniram ki, builki yarışlarımız, tədbirlərimiz daha gözəl, daha uğurlu, daha yaxşı olacaq. Biz daha böyük nəticələr əldə edəcəyik. Medallarımızın, qızıl medallarımızın sayı çox olacaq. Komandalarımıza, idmançılarımıza hər kəsə uğurlar arzu edirəm.
Demək istəyirəm ki, hər zaman, həmişə, bu gün də dövlətimiz tərəfindən idmana, idmançılara böyük diqqət və qayğı var. İnanıram ki, bu hər zaman olacaq. Yəni həmişə biz Prezidentimizin dəstəyini, onun bizim yanımızda olduğunu hiss etmişik. Bir idmançı kimi bunu asanlıqla deyə bilərəm. Ölkə başçısı oyunlar, yarışlar, təlim-məşqlər zamanı həmişə bizim yanımızda olub. Baxmayaraq ki, qalib gəlmişik və ya məğlub olmuşuq, son ana kimi bizim yanımızda olub, bizi dəstəkləyib. Düşünürəm ki, bu cür dəstəkdən sonra biz daha böyük uğurlar qazanacağıq. Cənab Prezidentimizə bir daha təşəkkür etmək istəyirəm. Arzu edirəm ki, uğurlarımız daha bol olsun”.
