"Tour d’Azerbaidjan-2017”-nin ilk mərhələsi arxada qaldı
Ümummilli Lider Heydər Əliyevin 94-cü ildönümünə həsr olunmuş “Tour d’Azerbaidjan-2017” veloturu başlanıb. Sportline.az xəbər verir ki, ilk yarış günündə iştirakçılar Dövlət Bayrağı Meydanından Sumqayıt şəhər İcra Hakimiyyətinin qarşısınadək məsafədə mübarizə aparıblar.
150 km məsafəni hamıdan tez İsrailin Pro-kontinental "İsrael Cycling Academy" komandasının üzvü Mikhel Raim qət edib - 3 saat, 4 dəqiqə, 11 saniyə. Latviyanın kontinental "Rietumu Banka-Riga" komandasının təmsilçisi Emils Liepins və İtaliyanın Pro-Kontinental "Nippo Vini-Fantini" klubunun velosipedçisi Pyer Paolo de Neqri mərhələ qalibi ilə eyni vaxt göstəricisinə imza atsalar da, fotofinişə əsasən 2-3-cü yerləri tutublar. Azərbaycanın kontinental "Synergy Baku" komandasının üzvlərinin hamısı marşrutu ümumi pelotonda başa vurublar.
Mərhələ qalibiyyəti Mikhel Raim həmçinin ümumi təsnifatın liderliyinə də yüksəldib və o mavi rəngli "Synergy" köynəyinə yiyələnib. Bundan başqa, Raim aralıq sprintlərində hamıdan çox xal toplamaqla ən yaxşı sprinter üçün nəzərdə tutulan yaşıl rəngli "SOKAR" köynəyinə də sahib çıxıb.
Mərhələnin ən yaxşı dağ velosipedçisi Ukraynanın kontinental "Kolss" komandasının üzvü Vitaliy Buts olub və o qırmızı rəngli "AZAL" köynəyinə layiq görülüb. ABŞ-ın Pro-kontinental "Novo Nordisk" klubunun təmsilçisi Mehdi Benhamuda isə ən yaxşı gənc velosipedçi kimi bənövşəyi rəngli "ATAHOLDİNG" köynəyi ilə mükafatlandırılıb.
Velosipedçiləri Azərbaycan Velosiped İdmanı Federasiyasının vitse-prezidenti, Avropa Velosipedçilər Birliyinin Rəhbər Komitəsinin üzvü Sahib Ələkbərov, Avropa Velosipedçilər Birliyinin vitse-prezidenti Aleksandr Qusyatnikov və Sumqayıt şəhər İcra Hakimiyyətinin başçısı Zakir Fərəcov təltif ediblər. Bundan başqa, Zakir Fərəcov mərhələ qalibini və Azərbaycanın "Synergy Baku" komandasının xüsusi xatirə hədiyyələri ilə təltif edib.
Mayın 4-də yarışın 2-ci mərhələsi keçiriləcək. Bu dəfə iştirakçılar paytaxt Bakıdan İsmayıllıyadək olan 187 km məsafəni qət edəcəklər. Qeyd edək ki, “Tour d’Azerbaidjan-2017” yarışında 18 ölkənin 22 komandası mübarizə aparır.
