Abdullah Zubir: “Qarabağ”ın necə iddialı olduğu hər kəsə məlumdur"
"Sevincimi necə ifadə edəcəyimi bilmirəm. Doğrudan da “Qarabağ” forması ilə 100 oyun keçirmək qürurvericidir".
Sportline.az xəbər verir ki, bu fikirləri "Qarabağ" klubunun futbolçusu Abdullah Zubir klubun rəsmi saytına açıqlamasında deyib.
30 yaşlı yarımmüdafiəçi Ağdam təmsilçisində çıxış etdiyi üçün xoşbəxt olduğunu bildirib: "Hər şey ürəyimcə və zövqümcədir. Bu klubda möhtəşəm insanlar cəmləşib. Komandanın uğuru üçün hamı çalışır. Belə möhtəşəm klubda oynadığım və 100-cü oyunumu keçirdiyim üçün çox xoşbəxtəm.
Mərakeş əsilli fransalı futbolçu oyunçu "Qarabağ"la müqaviləsini 3 il artırmasından danışıb və komandaya gələcək oyunlarda fayda verməyə çalışacağını vurğulayıb: “Qarabağ”ın necə iddialı olduğu hər kəsə məlumdur. Özümə qarşıdakı illərdə də komandanın iddialarına cavab verəcək səviyyədə oyun nümayiş etdirməyi arzulayıram. Daha çox qollar vurmaq və “Qarabağ”ın daha böyük zəfərlərinə töhfə verməyi arzu edirəm. Əlimdən gələni edəcəyəm ki, qarşıdakı dönəm əvvəlkindən daha uğurlu və yaxşı olsun".
Qeyd edək ki, Zubirin "Qarabağ"da 100-cü oyunu Azərbaycan Premyer Liqasının XVI turunda "Sumqayıt"la səfərdə qolsuz heç-heçə etdikləri görüşə təsadüf edib.
