Faiq Həsənov: "FİDE-nin bizə verdiyi bu hüquqdan yararlanmaq qərarına gəldik"

"Azərbaycanda keçirilən bütün beynəlxalq yarışlar çox yüksək səviyyədə təşkil olunur. Hər dəfə yenilik, müasirlik görürük. Bu gün start götürən Şahmat Olimpiadası da bu ənənənin davamıdır". Bu sözləri SportLine.az saytına açıqlamasında Azərbaycan Şahmat Federasiyasının vitse-prezidenti, 42-ci Ümumdünya Şahmat Olimpiadasının baş hakimi Faiq Həsənov deyib.

Bakıda təşkil olunan mötəbər yarış haqda fikirlərini bölüşən F.Həsənov FİDE rəsmlərinin və bütün qonaqların təşkilatçılığı yüksək qiymətləndirdiyini söyləyib: "Həm təşkilati cəhətdən, həm də iştirakçıların sayı baxımından bu Olimpiada ən möhtəşəmidir. Bakıda keçirilən hər bir yarış kimi Şahmat Olimpiadası da böyük nüfuz qazandı. Bütün dünyada bu haqda danışırdılar və hər kəs bu yarışda iştirakçı olmaq istəyirdi. Bunun nəticəsidir ki, hazırda rekord sayda komanda burada qələbə uğrunda mübarizə aparır. Dünyanın ən güclü şahmatçıları paytaxtımızda toplaşıb. Onlar özləri də möhtəşəm açılışdan təsirləndiklərini dedilər".

Azərbaycanda şahmat idman növünə həmişə yüksək dövlət qayğısının göstərildiyini deyən vitse-prezident, "Bu gün cənab prezident İlham Əliyevin Kristal Zala gəlməsi, buradakı şəraitlə tanış olması, ilk gedişi etməsi ölkəmizdə idmana, eləcə də şahmata göstərilən diqqəti bir daha sübut etdi", - deyə bildirib.

Şahmatçılarımızın Olimpiadaya yüksək səviyyədə hazırlaşdığını deyən F.Həsənov komandalarımızdan yalnız qələbə gözləyir: "FİDE-nin qaydalarına görə, təşkilatçı ölkə, həm kişilərin, həm də qadınların yarışında üç komanda ilə təmsil oluna bilər. Biz də bu hüquqdan yararlanmaq qərarına gəldik. I və II komandalarımızda ən güclü şahmatçılarımız cəmləşib. III komandanı formalaşdırarkən isə qərara gəldik ki, gənc və istedadlı şahmatçılarımıza şans verək. Bu komandaların heyətində 16 yaşadək şahmatçılarımız çıxış edirlər. Məqsəd, onlara belə bir mötəbər yarışda təcrübə toplamasına şərait yaratmaqdır. Onların gələcək karyerasında, bu, öz müsbət təsirini göstərəcək. İnanıram ki, yarışın sonunda onlar da uğurlu nəticə ilə bizi, yaxşı mənada, təəccübləndirəcəklər".

Vüsal Məmmədzadə
Qambit | SportLine.az
Layihə AFFA yanında Media Komitəsi tərəfindən maliyyələşdirilir