Həndbol üzrə Azərbaycan çempionatı başlanır

Martın 20-də həndbol üzrə növbəti respublika çempionatı başlanacaq.

Sportline.az saytına Azərbaycan Həndbol Federasiyasından verilən məlumata görə, sayca 28-ci Azərbaycan çempionatının oyunları Şağan Olimpiya İdman Kompleksində keçiriləcək.

Ölkə biriniliyinə 4-ü qadınlardan , 6-sı kişilərdən ibarət olmaqla  10 komanda qatılacaq. Qadınların yarışında “Azəryol”, “Azərsu”, “Qarabağ”, “İdman Akademiyası”, kişi həndbolçuların mübarizəsində isə “Bakı”, “Məhsul”, “Təhsil”, U-18 İdman Akademiyası, U-16, “Gənclər Birliyi” komandaları qələbə uğrunda yarışacaqlar.

Çempionatın martın 20-ci saat 11-də başlanacaq açılış oyununda “ Gənclər Birliyi”  –“ Bakı”  klubu ilə üz-üzə gələcək. Ardınca “İdman Akademiyası” ilə “Qarabağ”  komandası meydana çıxacaq.

Saat 14:00-da ölkə çempionatının açılış mərasimi keçiriləcək. İlk yarış gününə  U 16 – U 18 İdman Akademiyası, “Azəryol” – “Azərsu” və “Təhsil” – “Məhsul”  görüşləri ilə yekun vurulacaq.

Martın 26-da isə “ Bakı –“ Təhsil”,  “Qarabağ” – “Azəryol”, U 18 İdman Akademiyası – “Gənclər Birliyi”, “Azərsu” – “İdman Akademiyası”, “Məhsul” – U 16  görüşləri keçiriləcək.