"Neftçi"nin legioneri: "Maliyyə baxımdan problem yoxdur"

“Yunanıstan üçün darıxıram. Əlbəttə, xaricdə çıxış etməyin müsbət tərəfləri var. Ancaq özümüzünkülər üçün darıxıram. Hərçənd Bakı yüksəlişdə olan, bir neçə il sonra daha da inkişaf edəcək bir şəhərdi”.

Sportline.az xəbər verir ki, bunu “Neftçi”nin futbolçusu Evangelos Platellas “Metropolis 95.5 FM” radiosuna açıqlamasında deyib. 31 yaşlı yarımmüdafiəçi həmyerliləri ilə söhbətində Bakıya uyğunlaşmağın onun üçün çətin olmadığını söyləyib: “Azərbaycanlılar çox qonaqpərvərdirlər və klubum bu məsələlərdə mənə kömək etdi. Hər zaman yanımda yardım edəcək bir nəfər olur. Bura gəlməyi ən yaxşı seçim sayıram. Çünki Yunanıstanda bəzi insanlar bizə hörmət etmirlər. Xoşbəxtəm. Maliyyə baxımdan problem yoxdu. Heç kim bununla bağlı çətinlik çəkmir. Klubun sponsorları var və hamı bilir ki, pulu batmayacaq”.

Cari mövsümdə “Neftçi”nin əsas heyətində yerini itirən Platellas sabiq komandası Yunanıstan “Aris”inə dönmək ehtimalına da toxunub: “Aris” ötənilki kimi çıxış etmir, komandada stabillik çatmır. Yeni baş məşqçiləri var və daha yaxşı oynayacaqlar. Heyətdə hər bir mövqe üzrə yaxşı oyunçular var. Mənim mövqeyim boş olsaydı, başqa məsələ - orada ola bilərdim. Karyeram pis alınmayıb. Uşaq yaşlarımdan futbolçu olmaq istəyirdim. İnanıram ki, nə qədər çox məşq etsən, bir o qədər də uzun müddət oynaya bilərsən. Millidə oynamaq? Sinəndə gerblə çıxış etmək önəmlidi, böyük qürurdu. Əgər sizdə Karaqunis, Dellas, Basinasın istəyi, əzmi yoxdursa, alınmaz”.

Yunan futbolçu Azərbaycan çempionatında “Qarabağ”la rəqabətdən danışarkən, ötən mövsüm bu komandanı məğlub etdikərini, lakin sonluğun istədikəri kimi alınmadığını vurğulayıb.

Qeyd edək ki, Platellas bu ilin yanvarında “Neftçi” ilə 1,5 illik müqavilə bağlayıb. (report.az)