"Marsel"in çempionat oyununun saatı "Qarabağ"a görə dəyişdirilib

"Qarabağ"ın UEFA Konfrans Liqasının pley-off mərhələsindəki rəqibi olan "Marsel"in fevralın 27-də Fransa Liqa 1-də "Trua"ya qarşı keçirməli olduğu XXVI tur oyununun başlama saatı dəyişdirilib.

Sportline.az Fransa Futbol Liqasının (LFP) rəsmi saytına istinadən xəbər verir ki, qarşılaşma əvvəldən nəzərdə tutulduğu kimi Bakı vaxtı ilə saat 16:00-da deyil, saat 20:05-də başlayacaq.

Fevralın 24-də Bakıda Ağdam klubunun qonağı olacaq "Marsel" məsafənin uzaqlığını və yol yorğunluğunu nəzərə alaraq LFP-yə müraciət etmişdi. Qurum müvafiq araşdırmalardan sonra kluba müsbət cavab verib.

Qeyd edək ki, "Qarabağ" "Marsel" komandası ilə ilk görüşünü fevralın 17-də səfərdə keçirəcək.