FİDE-nin yeni reytinqi açıqlandı

Beynəlxalq Şahmat Federasiyası (FIDE) yeni reytinq siyahısını açıqlayıb.

Sportline.az FIDE-nin rəsmi saytına istinadən xəbər verir ki, ilk "10-luq"da Azərbaycanın 2 şahmatçısı yer alıb.

Şəhriyar Məmmədyarov 2782 xalla 6-cıdır. 36 yaşlı qrossmeyster iki pillə irəliləyib. Teymur Rəcəbov isə 2 763 xalla 10-cu yerdəki mövqeyini qoruyub.

Qədir Hüseynov (2665) 2 pillə irəliləyərək 72-ci olub. 11 pillə geriləyən Nicat Abbasov (2656) isə 84-cü yerlə kifayətlənib. Rauf Məmmədov 3 addım irəliləyib və 87-ci sırada qərarlaşıb.

Siyahıda ilk “üçlük” dəyişməyib. Norveçli dünya çempionu Maqnus Karlsen (2847) birinci, Fabiano Karuana (ABŞ, 2806) ikinci, Dinq Liren (Çin, 2799) üçüncüdür.

Qadın şahmatçılardan Günay Məmmədzadə 4 pillə irəliləyərək 2460 xalla 25-ci, 5 pillə irəliləyən Gülnür Məmmədova 2385 xalla 77-cidir. Xanım Balacayeva (2376) isə 91-cı sıradakı mövqeyini qoruyub.