Milli komanda Ermənistana qarşı
Sloveniyanın Çatej şəhərində təşkil olunan şahmat üzrə komandalarası Avropa çempionatında bu gün altıncı turun görüşləri keçiriləcək.
Sportline.az xəbər verir ki, kişilərdən ibarət Azərbaycan millisi Ermənistanla üz-üzə gələcək. Qadınlar isə İtaliya ilə münasibətləri aydınlaşdıracaq.
Turun bütün qarşılaşmaları Bakı vaxtı ilə saat 18:00-da başlanacaq.
Hesabında 8 xal olan kişi seçməmiz lider Rusiyadan yalnız əlavə göstəricilərə görə geri qalaraq 39 kollektiv arasında ikinci pillədə qərarlaşıb. Ukrayna, Macarıstan, Ermənistan və Niderland komandaları da eyni sayda xala malikdir.
Qadın kollektivimiz isə 7 xalla beşincidir. Maksimum sayda - 10 xal toplayan Rusiya birinci, Gürcüstan və Yunanıstan hərəyə 8 xalla iki-üçüncü sıradadırlar.
Qadınların yarışında 31 komanda mübarizə aparır.
Qeyd edək ki, İsveçrə sistemi üzrə 9 turdan ibarət Avropa çempionatına noyabrın 21-də yekun vurulacaq.
