Avropa kubokunda qızıl medal

Çexiyanın paytaxtı Praqa şəhərində gənc cüdoçuların Avropa kuboku yarışı başa çatıb.

Sportline.az xəbər verir ki, Azərbaycan millisi beynəlxalq turnirin son günü aktivinə daha bir medal yazdırıb.

+100 kq çəki dərəcəsində mübarizə aparan cüdoçumuz İmran Yusifov bütün rəqiblərinə qalib gələrək 1-ci yeri tutub. İdmançımıza Avropa kubokunun qızıl medalı təqdim olunub və onun şərəfinə dövlət himnimiz səsləndirilib, üçrəngli bayrağımız qaldırılıb.

Beləliklə Azərbaycan cüdoçuları Praqada 2 qızıl və 2 bürünc medal qazanıblar. Yarışın ilk günü Rövşən Əliyev qızıl, Rəşad Yelkiyev və Davud Abbaslı isə bürünc medala sahib olub.

Qeyd edək ki, Avropa kubokunda 39 ölkədən 437 cüdoçu mübarizə aparıb.