Cüdoçularımızın komanda yarışı uğursuz alındı

Tokioda keçirilən cüdo üzrə dünya çempionatında qarışıq komanda yarışları keçirilib. 

Sportline.az xəbər verir ki, Azərbaycan millisi 1/8 finalda Avropa çempionu Portuqaliya ilə görüşüb.

4:3 hesabı ilə qalib gələn komandamız uğurun davamını gətirə bilməyib. 1/4 finalda Braziliyaya 1:4 hesabı ilə uduzan cüdoçularımız təsəlliverici görüşlərə qatılıb və bürünc medal uğrunda ilk cəhddə Cənubi Koreyadan güclü olublar - 4:2. Amma mükafat uğrunda son görüşdə Rusiyaya yenilən (1:4) yığmamız mundialı medalsız başa vurub.

Qeyd edək ki, komanda yarışlarından fərqli, fərdi yarışlarda millimizin 2 üzvü fəxri kürsüyə yüksəlməyi bacarmışdı. Belə ki, 73 kq çəkidə mübarizə aparan Rüstəm Orucov gümüş, Hidayət Heydərov isə bürünc medala sahib çıxmışdı.