Mahir Emreli Çempionlar Liqasında nə qədər qazanacaq?

UEFA Çempionlar Liqasının pley-off mərhələsi üzrə "Budyo Qlimt"ə qarşı cavab oyununda  4:1 hesabı ilə qalib gələn "Dinamo" (Zaqreb) qrup mərhələsinə vəsiqə qazanıb.

Sportline.az xəbər verir ki, E qrupunda yer alan Zaqreb təmsilçisinin bu uğurunda Azərbaycan millisinin üzvü Mahir Emrelinin də rolu olub. Qitənin ən güclü 32 klubu arasına düşdüyünə görə "Dinamo" ən azı 22 milyon avro qazanıb. 

Bu məbləğin 15,94 milyon avrosu qrupa düşməyə, 6 milyonu isə klubun son beş ildəki əmsalına görədir. Bundan əlavə, UEFA qrupda qazanılan hər xalı 930 min avro ilə mükafatlandıracaq.

Xorvatiya mətbuatının yaydığı məlumata görə, Çempionlar Liqasında ən çox oyun keçirən futbolçuların hər biri 100 min avro, digərləri isə bundan bir qədər az alacaq. Qrupdakı nəticələrə görə bonuslara gəlincə, “Dinamo” qələbəyə görə hər futbolçuya 50 min, heç-heçəyə görə isə 30 min avro ödəyəcək.

 Qeyd edək ki, E qrupundakı "Dinamo"nun rəqibləri "Milan", "Çelsi" və "Zaltsburq"dur.