"Qarabağ" "Ayaks" qarşısına belə çıxacaq

Bu gün UEFA Avropa Liqasında Liqa mərhələsinin 3-cü turunun oyunları keçiriləcək.

Sportline.az xəbər verir ki, Azərbaycan çempionu "Qarabağ" bu turda "Ayaks"ı qəbul edəcək.

Tofiq Bəhramov adına Respublika Stadionunda keçiriləcək oyunun favoriti Ayaks hesab olunsa da, Qarabağdan da qələbə gözləyənlərin sayı az deyil.

İlk iki görüşdə məğlubiyyətlə üzləşən komandamız bugünkü qarşılaşmada azarkeşləri sevindirmək əzmindədir. Baxmayaraq ki, bu, heç də asan vəzifə deyil. Azərbaycan çempionu bu gün qitənin ən populyar komandalarından birinə qarşı oyuna çıxacaq. Amsterdamlılar Bakıya aktivlərində 4 xalla gəliblər. Slaviya Praqa ilə heç-heçə edən Niderland təmsilçisi Beşiktaşın qapısından 4 cavabsız top keçirmişdi.

Hər iki düşərgədə itkilər var. Ağdam klubunda daha çox Marko Veşoviçin yoxluğu diqqət çəkir. Qapıçı Şahruddin Məhəmmədəliyev də zədəlidir. Amsterdam təmsilçisində isə Aksel Dongen, Qaston Avilya, Xuliyan Raykxof, Kristian Hilsson, Sivert Mannverk və Steven Berquis zədə səbəbindən kənarda qalıb. Yuri Bas isə “Slaviya Praqa” ilə matçda aldığı qırmızı vərəqə səbəbindən meydana çıxmayacaq.

Saat 20:45-də başlanacaq matçı şotlandiyalı hakim Nikolas Volş idarə edəcək.