Elxan Məmmədov: "Avropa klubları "Qarabağ"la qarşılaşmaqdan qorxurlar"

"Avropa klubları "Qarabağ"la qarşılaşmaqdan qorxurlar".

Sportline.az xəbər verir ki, bunu FIFA-nın Avropa Milli Assosiasiyaları Departamentinin direktoru Elxan Məmmədov AFFA-nın növbəti Konfransında deyib.

E.Məmmədov Ağdam klubunun Avropa arenasındakı uğurlarından bəhs edib: "Futbol ictimaiyyəti "Qarabağ"dan danışır. Əvvəllər Avropa klubları "Qarabağ"la qarşılaşmaq istəyirdilər. Ancaq indi püşkatma zamanı buna çəkinirlər. Daha əvvəllər "Neftçi" və "Qəbələ" də avrokubokların qruplarında yer alıblar. Təəssüf ki, millimiz bizi hələ də sevindirmir. Ancaq bu inkişaf davam etdikcə, yığmamızın da uğur qazanacağına inanıram".

O, AFFA prezidenti Rövnəq Abdullayevlə birgə çalışdığı üçün böyük fəxr hissi keçirdiyini bildirib: "15 il ərzində birlikdə burada işləmişik. Əvvəllər qarşınızda çıxış edəndə hazırlaşırdım. Ancaq bu dəfə düşündüm ki, hazırlaşmayacağam, ürəyimdən keçənləri deyim. Hörmətli Rövnəq müəllim, 15 il ərzində sizin kimi rəhbərlə çalışmaq mənim üçün şərəfdir. Bu müddətdə öz biliyinizi, təcrübənizi əməkdaşlarla bölüşürdünüz. Sizinlə işləmək təcrübəsi beynəlxalq karyeramda böyük kömək olur. Əslində sizin futbol fəaliyyətiniz 20 ildir. Çünki 2004-cü ildə "Neftçi"də fəaliyyətə başladınız. 16 il ərzində Azərbaycan futbolu üçün miras yaratdınız".

Elxan Məmmədov 16 ildə Bakıda çoxsaylı stadionlar inşa olunduğunu vurğulayıb: "2008-ci ildə Bakıda cəmi 2 stadion mövcud idi. Ancaq geridə qalan illərdə çox sayda arenalar inşa olundu. Hazırda da bu meydançaların hamısından istifadə olunur. Xarici ölkələrdə gedəndə müqayisələr aparıram. AFFA-nın yaratdığı tədris sistemi də çox önəmli idi. UEFA ilə birlikdə məşqçi kursları yaradıldı. Hazırda fəaliyyət göstərən mütəxəssislər həmin sistemdən çıxıblar. İdarəçilik də vacibdir. Bu gün Azərbaycanda futbol menecerləri yetişir. AFFA-nın daxilində, klublarda menecerlər yüksək səviyyədə çalışırlar. Ancaq ən vacibi futbol mütəxəssislərinin yanımızda olmasına ehtiyacımız var. Onların təcrübəsindən yararlanmalıyıq".

O, Peşəkar Futbol Liqasının rəhbərliyinə də təşəkkürünü bildirib: "Təəssüf ki, Elxan Səmədov və Aslan Şahgəldiyev hazırda bizimlə deyillər. İnanıram ki, hər ikisi yaxın gələcəkdə yenidən bizimlə birlikdə olacaqlar".

Elxan Məmmədov AFFA-nın yeni rəhbəriyinə də uğurlar arzulayıb: "FİFA olaraq bundan sonra da dəstəyimizi davam etdirəcəyik".