EYOF: Azərbaycan guşəsinin açılışı olub
Slovakiyanın Banska Bistritsa şəhərində Olimpiya Mədəniyyəti və Təhsil Proqramının (OCEP) pavilyonunda Azərbaycan guşəsinin rəsmi açılışı olub.
Milli Olimpiya Komitəsindən (MOK) Sportline.az saytına verilən məlumata görə, XVI Avropa Gənclər Yay Olimpiya Festivalını (EYOF) əlamətdar edən daha bir məqam festivalın tarixində ikinci dəfə olaraq OCEP pavilyonunun qurulmasıdır.
EYOF-un 5-ci günü OCEP pavilyonunda Azərbaycan guşəsi fəaliyyətə başlayıb. 28 ölkənin iştirak etdiyi OCEP pavilyonunda Azərbaycanı Slovakiyanın 2 qardaşlaşmış məktəbi və Bakının Yuri Kovalyov adına 229 saylı tam orta məktəbinin şagirdləri təmsil edib. Açılış mərasimində MOK-un Baş katibi Azər Əliyev, Avropa Olimpiya Komitəsinin İcrayyə Komitəsinin üzvü Liney Rut Halldorssdottir, Slovakiya Olimpiya Komitəsinin prezidenti Anton Zikel, Polşa Olimpiya Komitəsinin prezidenti Andjey Krasnitski, Bakı Şəhər Təhsil İdarəsinin müdiri Mehriban Vəliyeva, Təhsil Nazirliyinin Məktəbdənkənar fəaliyyətin təşkili şöbəsinin sektor müdiri Hilal Salmanov, Azərbaycanın Avstriya Respublikasındakı səfirliyinin nümayəndələri, idmançılar və başqa rəsmilər iştirak edib.
Mərasimdə OCEP proqramının Azərbaycanın təşəbbüsü ilə Bakıda təşkil edilmiş XV Avropa Gənclər Yay Olimpiya Festivalından start götürərək Slovakiyada davam etdirilməsinin Olimpiya hərəkatının gənclər arasında təşviq olunmasında əhəmiyyətli rolu xüsusi vurğulanıb. Qeyd olunub ki, bu təşəbbüs gələcəkdə təşkil olunacaq Festivallarda da tətbiq ediləcək.
Azərbaycanın Slovakiya Olimpiya Komitəsinə və Avropa Olimpiya Komitəsinə OCEP-in xalçaları təqdim olunduqdan sonra qardaşlaşmış Slovakiya və Azərbaycan məktəblərinin şagirdləri qonaqlar qarşısında milli rəqsləri ilə çıxış edib. Daha sonra qonaqlar pavilyonda quraşdırılmış Azərbaycanın və digər ölkələrin guşələrini ziyarət edərək məktəblilərin təmsil etdikləri ölkələrin mədəniyyəti, tarixi, idmanı, mətbəxi və s. sahələr üzrə təqdimat və viktorinalarını seyr ediblər. Azərbaycan guşəsi pavilyonda təmsil olunan digər 8 ölkə ilə müqayisədə dekorasiyası, təklif olunan təamları, fəaliyyətlərin zənginliyi seçilmiş və qonaqların daha çöx rəğbətini qazana bilib.
İyulun 31-ə qədər Banska Bistritsada olacaq OCEP məktəbliləri EYOF 2022 İdman Parkına, ərazidəki idman obyektlərinə səfər edərək idman yarışlarına baxmaq imkanı da qazanacaqlar. Avropa Gənclər Olimpiya Səfirlərinin təhsil proqramında iştirak edəcək məktəblilər Azərbaycanı təmsil etməklə yanaşı, digər ölkələrin sərgi stendlərində də iştirak edəcəklər.
Qeyd edək ki, OCEP-ə Bakı 2019 Avropa Gənclər Olimpiya Festivalı çərçivəsində start verilib. Beynəlxalq Olimpiya Komitəsinin Olimpiya Həmrəyliyi fondu və Avropa Olimpiya Komitəsinin dəstəyi ilə həyata keçirilən layihə Azərbaycan Respublikası Təhsil Nazirliyinin tərəfdaşlığı ilə Milli Olimpiya Komitəsi tərəfindən həyata keçirilir. 2021-2022-ci illər ərzində OCEP-in coğrafiyası genişlənərək təmsil olunan ölkələrin sayı 56-a çatdırılıb. Bu müddət ərzində Azərbaycandan olan qardaşlaşmış məktəblərin təşkil etdiyi tədbir və fəaliyyətlər 200 minə yaxın məktəblini əhatə edib.
