Dünya çempionatı: İki boksçumuz yoluna davam edir
Rusiyanın Yekaterinburq şəhərində, boks üzrə dünya çempionatı davam edir.
Sportline.az xəbər verir ki, artıq 1/8 final mərhələsi arxada qalıb.
Seçmə komandamızın 4 üzvündən ikisi bu mərhələni adlayanlar sırasındadır.
Avropa Oyunlarının qalibi Alfonso Dominqes (81 kq) avstriyalı Umar Cambekova 4:1 hesabı ilə qalib gələrək 1/4 finada yüksəlib. O, bu mərhələdə özbəkistanlı Dilşodbek Ruzmetovla qarşılaşacaq.
+91 kq çəki dərəcəsində çıxış edən Məhəmməd Abdullayev isə misirli Yosri Rezk Mustafanı 3:2 hesabı ilə üstələyib. O, 1/4 finalda avstraliyalı Justis Huni ilə üz-üzə gələcək.
Digər iki boksçumuz Məsud Yusifzadə (52 kq) və Tayfur Əliyev (57 kq) isə 1/8 finalda məğlub olublar.
Qeyd edək ki, dünya çempionatında 1/4 final mərhələsinin görüşləri bu gün keçiriləcək. Azərbaycanın hər iki boksçusu rinqə axşam sessiyasında çıxacaq.
