Boksçumuz dünya çempionatının yarımfinalına yüksəldi

Almaniyanın Hambur şəhərində boks üzrə dünya çempionatı davam edir. Sportline.az xəbər verir ki, bu gün 1/4 final mərhələsinin döyüşləri keçirilir. Azərbaycan Boks Federasiyasının məlumatına görə, günün ilk sessiyasında Azərbaycan millisinin 1 üzvü qüvvəsini sınayıb.

75 kq çəki dərəcəsində rinqə çıxan Kamran Şahsuvalı kolumbiyalı Xorxe Vivas Palasiosla üz-üzə gəlib. Döyüş 3:2 (27:30, 29:28, 29:28, 28:29, 29:28) hesabı ilə Olimpiya mükafatçımızın xeyrinə başa çatıb. O, yarımfinala yüksəlməklə, özü üçün ən azı bürünc medalı da təmin edib. 

Şahsuvarlı avqustun 31-də baş tutacaq 1/2 finalda qazaxıstanlı Abilxan Amankulla qarşılaşacaq.

Qeyd edək ki, günün ikinci sessiyada dünya çempionumuz Məhəmmədrəsul Məcidov (+91 kq) da rinqə çıxacaq. O, yarımfinala vəsiqə üçün Camili-Dini Aboudo-Moindze (Fransa) ilə döyüşəcək.