Seçmə komandalarımızın heyəti açıqlandı

Azərbaycanın sərbəst və qadın güləşçiləri Ukraynanın paytaxtı Kiyevdə təşkil olunacaq beynəlxalq turnirə qatılacaq.

Sportline.az xəbər verir ki, Ukraynanın məşhur güləşçiləri və məşqçilərinin xatirəsinə keçiriləcək ənənəvi yarış fevralın 26-da başlanacaq.

Böyük məşqçi Zəlimxan Hüseynovun və məşqçi Arif Abdullayevin rəhbərliyi altında sərbəst güləş millisinin 12 üzvü çıxış edəcək. Heyətdə Mahir Əmiraslanov, Əfqan Xaşalov, İslam Bazarqanov (hamısı 57 kq), Əhmədnəbi Qvarzatilov (61 kq), Əli Rəhimzadə, Turan Bayramov (hər ikisi 65 kq), Cəbrayıl Hacıyev (70 kq), Əşrəf Aşırov (74 kq), Rəşad Yusifli (79 kq), Osman Nurməhəmmədov (92 kq), İslam İlyasov (97 kq) və Vahid Qalayev (125 kq) yer alıb.

Fevralın 28-dək davam edəcək turnirdə qadınlardan ibarət millinin 9 güləşçisi qüvvəsini sınayacaq. Baş məşqçi Aslan Ağayev və məşqçi Rövşən Umudovun rəhbərliyi altında Türkan Nəsirova (50 kq), Leyla Qurbanova, Tatyana Varansova (hər ikisi 53 kq), Alyona Kolesnik (57 kq), Tatyana Omelçenko (62 kq), Elis Manolova (65 kq), İrina Netreba (68 kq), Gözəl Zutova və Səbirə Əliyeva (hər ikisi 76 kq) mübarizə aparacaq.

Qeyd edək ki, görüşlərin idarə edilməsində ölkəni beynəlxalq dərəcəli hakimlər Vaqif Zeynallı və Həbib Nurulu təmsil edəcək.